முனைவர்மேகலா
சித்ரவேல்

முனைவர் மேகலா சித்ரவேல் 1952 ஆம் ஆண்டு ஏப்ரல் 6 ஆம் தேதி, கடலூர் புதுப்பாளையத்தில் வழக்கறிஞர் உயர்திரு. இளம்வழுதி – திருமதி.மாலதி இணையருக்குப் பிறந்தார். பகுத்தறிவும், சமூக முன்னேற்றமும் மிகவும் மதிக்கப்பட்ட ஒரு பெரு நிலக்கிழார் குடும்பச் சூழலில் அவரது இளமை மலர்ந்தது.

தொடக்கக் கல்வியை கடலூர் புதுப்பாளையம் புனித அன்னாள் உயர்நிலைப் பள்ளியில் கற்றார். சிறுவயதிலேயே வாசிப்பின் மீது கொண்ட ஈடுபாடு, அவரை எழுத்தை நோக்கி இட்டுச் சென்றது.

எழுத்தின் வழியே மட்டுமல்லாமல், கல்வியின் வழியேயும் சமூகத்திற்குப் பங்களித்தார் முனைவர் மேகலா சித்ரவேல். சில ஆண்டுகள் ஆசிரியராகப் பணியாற்றியதோடு, இராணிப்பேட்டையில் Sathya Nursery & Primary School என்கிற பள்ளியை நிறுவி நடத்தியும் வந்தார்.

பின்னாளில் இப்பள்ளியை Vetri Matriculation School என்கிற பெயரில் தரம் உயர்த்தி, குறைந்த கட்டணத்திலும், பொருளாதாரத்தில் பின்தங்கிய நூற்றுக்கணக்கான மாணவர்களுக்கு கட்டணமில்லாமலும் கல்வி சேவை புரிந்தார்.

மாணவர்களின் கல்வி மட்டுமின்றி, அவர்களின் கலை, பண்பாட்டு வளர்ச்சியிலும் கவனம் செலுத்தினார். ஆண்டுவிழாக்கள், மேடை நிகழ்ச்சிகள், போட்டிகள் என பல்வேறு பயிற்சி நிகழ்வுகளின் மூலம் தலைமுறையினரை வளர்த்தெடுத்தார்.

தமிழில் 62 நாவல்களையும், பல்வேறு தலைப்புகளில் 38 நூல்களையும் படைத்த முனைவர் மேகலா சித்ரவேல் அவர்கள், பொது வாசிப்புக்குரிய சிறுகதைகளாலும் நாவல்களாலும் பரவலான வாசகர் வட்டத்தைச் சென்றடைந்தார்.

யதார்த்தத்தையும் உண்மை நிகழ்வுகளையும் அனுபவங்களையும் எளிய நடையில் பேசுவதாக அவரது படைப்புகள் அமைந்தன. பெண்களை மையப்படுத்திப் பல நூல்களைத் தந்த எழுத்தாளராக அறியப்படுகிறார்.

அவரது சிறுகதைகள் அனைத்திந்திய வானொலியில் ஒலிபரப்பப்பட்டன. குமுதம் சினேகிதி இதழின் துணை ஆசிரியராகவும் பணியாற்றி, இதழியல் துறையிலும் தடம் பதித்தார்.

சிறந்த பேச்சாளராகவும் விளங்கிய மேகலா சித்ரவேல், இலக்கிய – சமூகக் கூட்டங்களில் பங்கேற்று, தன் எழுத்தின் வழியேயும் மேடையின் வழியேயும் சமூகத்திற்குக் குரல் கொடுத்தார்.

பெண்களின் வாழ்வையும் உரிமைகளையும் மையப்படுத்திய அவரது படைப்புகள், பல தலைமுறைப் பெண் வாசகர்களுக்கு உத்வேகமாக அமைந்தன. இலக்கிய விழாக்கள், விருது வழங்கும் நிகழ்வுகள், சமூக நிகழ்வுகளில் தொடர்ந்து பங்கேற்று வருகிறார்.